1. აიეტის სამეფო ადრე, უხსოვარ დროში ძველი კოლხეთის სამეფოში მეფობდა აიეტი. მისი სახელი მეზობელ სამეფოებშიც იყო ცნობილი, როგორც ძლიერი და მდიდარი მეფისა. ის მზის ღმერთის – ჰელიოსის ძე იყო, ასე ფიქრობდნენ მასზე კოლხები და ძველი ბერძნები. მეფე აიეტის ძლიერებისა და სიმდიდრის სიმბოლო იყო ოქროს საწმისი. ის დედაქალაქ აიას ახლოს ეკიდა დიდ მუხის ხეზე და გველეშაპი დარაჯობდა. ოქროს საწმისი უძვირფასესი განძი იყო მთელი კოლხეთისთვის და ბევრ უცხო სამეფოს უნდოდა მისი ხელში ჩაგდება. მაგრამ ამას ვერავინ ბედავდა კოლხეთის ძლიერების გამო. არაჩვეულებრივი სანახავი იყო მეფე აიეტის სასახლე – ქვისგან გამოთლილ მაღალ სვეტებს სპილენძის თავები ჰქონდა. ბაღში შადრევნები იყო: ერთიდან რძე გადმოდიოდა, მეორიდან – სურნელოვანი ზეთი, მესამიდან – ღვინო, მეოთხიდან – ცივი, ანკარა წყარო.